《山歌結緣》

男

一閒就來登歌壇

唱首山歌齊儕聽

唱得唔好愛指出

涯會認真學下添

女

一閒就來登歌壇

哩只細哥好歌聲

歌聲溜溜系入骨

歌聲溜溜會過嶺

男

心想打魚就落潭

心想唱歌就出聲

巧遇妹子歌來駁

並蒂花開系還巖

女

風吹竹葉片片青

哥介山歌系生猛

猛龍過江又過海

儕儕尋汝把名籤

男

靚妹歌聲有咁甜

靚妹歌聲有咁粘

粘緊阿哥繃唔脫

粘緊阿哥同妹行

女

上棚腳步愛放輕

敢唱山歌愛太聲

爬裡高山過大海

哩擺同哥對得成

男

天上有月也有星

哥妹兩人上下廳

出出入入見得到

嘻嘻哈哈笑相迎

女

哥妹兩人共屋簷

出出入入並肩行

好好壞壞有人講

真真假假配得成

男

欖子好食兩頭尖

哥妹相連唔使驚

好好壞壞由人講

只愛倆儕有心談

女

幾多菜色幾多鹽

放得多哩菜會鹹

哥莫得寸又進尺

談情說愛事盲成

男

高山打鼓遠傳聲

同妹結緣在歌壇

如若妹子唔嫌棄

山歌同妹常相行

女

一坑過哩又一坑

腳下太路眾人行

哥繫有心常坐嬲

山歌隨汝過奈嶺