十想情人

　　(男女對唱版）

　　溫偉權編寫

　　男:

　　一想情人好心傷，

　　夜夜想妹到天光，

　　先日當初發過誓，

　　樣般妹子心岸狼。

　　女:

　　阿哥唔使岸悲傷，

　　老妹同汝講分詳，

　　齊家分手為汝好，

　　拆散汝家唔應當。

　　男:

　　二想情人心裡慌，

　　夜裡青眼到天光，

　　樣般老妹心岸恨，

　　恨心捨得多情郎。

　　女:

　　涯話阿哥唔使慌，

　　妹子把你放心上，

　　同汝分手涯心痛，

　　十分難捨有情郎。

　　男:

　　三想情人淚汪汪，

　　夜深人靜喑思量，

　　兩人牽手十幾載，

　　今日離別痛心腸。

　　女:

　　看到阿哥淚汪汪，

　　老妹獨自暗悲傷，

　　涯知阿哥有情義，

　　分別好比刀割腸。

　　男:

　　四想情人岸絕情，

　　今日翻臉唔認人，

　　兩人相愛有岸久，

　　汝話斷情就斷情。

　　女:

　　阿哥莫怪涯絕情，

　　無奈兩人有家庭，

　　旁人佢愛講閒話，

　　搞到矛面來見人。

　　男:

　　五想情人二月天，

　　想到阿哥發狂癲，

　　平時兩人感情好，

　　今日分手淚漣漣。

　　女:

　　看到阿哥發狂癲，

　　涯想回到汝身邊，

　　好想細聲同哥講，

　　老妹愛你在心田。

　　男:

　　六想情人在三更，

　　半夜醒來心裡驚，

　　夢裡常常同下嬲，

　　見妹唔到心滑冷。

　　女:

　　涯話阿哥心莫冷，

　　涯也夢裡常驚醒，

　　醒來唔見親哥面，

　　目汁雙流面括青。

　　男:

　　七想情人在四更，

　　心裡想妹唔敢聲，

　　話涯唔準打電話，

　　問妹想同慢人行。

　　女:

　　哥問涯同慢人行，

　　涯今老實話汝聽，

　　妹子感情好專一，

　　再唔喂同別人行。

　　男:

　　八想情人在五更，

　　靜靜細聽雞啼聲，

　　涯今想妹岸辛苦，

　　試問老妹汝知盲。

　　女:

　　五更聽到雞啼聲，

　　老妹醒來心著驚，

　　明知阿哥對涯好，

　　藏在心裡唔敢聲。

　　男:

　　九想情人天大光，

　　想到頭暈又腦漲，

　　先日汝話對涯好，

　　樣般今日變心腸。

　　女:

　　五更一過就天光，

　　涯望阿哥愛健康，

　　希望阿哥愛理解，

　　老妹無意把哥傷。

　　男:

　　十想情人在心田，

　　心裡想妹唔敢言，

　　都怪自家矛本事，

　　窮人難配嫩嬌連。

　　女:

　　涯話情哥莫亂言，

　　老妹苦悶在心田，

　　唔怪阿哥矛本事，

　　只怪兩人緣分淺。