「惹火港姐」蔡嘉欣去年落選後即獲無線力捧，工作量遠超同屆三甲，可惜「人紅是非多」，拜金、犯眾憎等負評不絕，有指她為了搭上有米新歡，狠飛拍拖數年的前度，她坦言失戀了一段時間才認識現任男友：「其實我係被飛嗰個！」

蔡嘉欣問心無愧，對所有是非抱「順其自然」的心態。

蔡嘉欣加入無線短短1年，極速被力捧拍劇及綜藝節目，除了主持《姊妹淘》，最近更參演劇集《飛虎之壯志英雄》、《智慧愛（AI）人》、《金宵大廈2》。星途看似一帆風順，但其實她深受是非困擾，更被封為「惹火港姐」！她無奈說：「一開始選港姐有咁多負面新聞都幾唔開心，好大壓力！當時食極唔肥，反而愈食愈瘦。但之後變得『佛系』，控制唔到嘅事情就唔去諗，只要問心無愧就得。」

嘉欣主動重提被指拜金搭上現任富貴男友，狠飛拍拖數年的無線藝人吳子衝，她說：「首先呢個唔系事實，其實我係被飛嗰個，當時失戀咗大半年先認識到依家嘅男朋友，但唔知點解變成我為咗錢飛人，又話因為有第三者。」

面對種種是非，她坦言一度萌生退出娛樂圈的念頭，但因不認輸的性格，決意堅持到底：「有諗過自己會唔會唔適合呢個行業，唉！我都唔知，見步行步、順其自然。好難得鼓起勇氣，唔想因為挫折而放棄，唔試過又唔甘心。」續稱初時希望開啟知名度，但經歷1年洗禮，現時目標變得簡單：「只想儘量唔好咁多負面新聞就夠。」

身為演戲初哥的她拍攝前做足功課，以免「佗衰家」：「一開始同場就係同輝哥（張兆輝）、馬Sir（馬德鍾）同Bosco（黃宗澤），一知道要同班大卡士合作，即刻喺屋企狂背劇本。開劇第1個禮拜，我唔敢講嘢，坐埋一邊睇劇本，之後先敢一齊玩。」更揚言沒有設下性感底線：「如果角色需要，我覺得唔介意，可以去到好盡。」

只要劇情需要，蔡嘉欣不介意X感演出。