香港第四波疫情嚴峻，政府早前收緊防疫措施，由本月10日開始，「限聚令」由4人減至2人，為期14天。除了餐廳食肆外，戶外活動亦被列入規管範圍內。

可是，在疫情爆發期間，仍有不少人堅持要到郊外呼吸新鮮空氣。日前和老公陳豪以夫妻檔出席活動賺錢的陳茵媺，今日在IG貼出和3個仔女一齊爬山的照片和短片。

只見陳茵媺在行山途中，邊拍片邊不斷鼓勵仔女向上行，可是細女Camilla體力有點透支，半路中途已彎低腰喘氣，更不慎跣倒，當Camilla跣低時，片段突然中斷，估計是陳茵媺出手營救囡囡。

有網民留言關心Camilla，陳茵媺回覆指細女無事，更指她即刻起身繼續行。另一方面，陳茵媺為把握在郊外影靚相，數度除下口罩，而她亦有在IG留言叫大家放心，除口罩只為影靚相，轉頭便會戴返。

其實陳豪日前出活動時，才親口說自己一家五口出街會俾人拉，因此暫時不敢亦都不會出街吃飯，會叫外賣回家，可是轉頭老婆就帶仔女齊齊去行山，難怪有網民留言勸陳茵媺為健康著想，這段時間最好和仔女乖乖留在家中。